पदम विश्वकर्माको उपन्यास “पाताल” को परिचर्चा कार्यक्रम सम्पन्न

२०८२ भदौ १८, काठमाडौं । साहित्यिक पत्रकार संघ (Literary Journalist Association)ले आज डालो रेस्टुरेन्ट, अनामनगर, काठमाडौंमा साहित्यकार पदम विश्वकर्माको उपन्यास “पाताल” को परिचर्चा कार्यक्रमको आयोजना गर्‍यो ।

साहित्यिक पत्रकार संघका अध्यक्ष राधेश्याम लेकालीको सभापतित्वमा आयोजना गरिएको सो कार्यक्रमको उद्घाटन पूर्व राजदूत कवि भीम उदासले पानसमा दीप प्रज्वलन गरेर गर्नुभयो ।

कार्यक्रमका प्रमुख अतिथि पूर्व राजदूत एवम् कवि भीम उदासले द्वन्द्व, अवसर र रोजगारीको अभावमा गैरकानूनी रूपमा अमेरिका जानेहरूको ठूलो संख्या रहेको र तिनीहरू चारैतिरबाट शोषणमा परेको जस्तो उठाउनै पर्ने संवेदनशील विषयलाई उपन्यासले उठाएको बताउनुभयो ।

सोही कार्यक्रममा विशिष्ट अतिथि प्रा.डा. सुरेन्द्र केसीले नेपालीहरूले भोगिरहेको पीडाप्रति राजनीतिक दल र नेताहरू संवेदनशील नभएको धारणा राख्नुभयो ।

कार्यक्रममा स्वागत गर्दै अध्यक्ष लेकालीले कार्यक्रमको उदेश्य र महत्वमाथि बोल्नु भएको थियो । उहाँले कृतिकारको परिचय, कृतिको महत्व, सापसको परिचय र अन्य समसामयिक विषयमा बोल्नु भएको थियो ।

समालोचक प्रा.डा. गोविन्दमानसिंह कार्कीले पाताल एक सफल उपन्यास भएको र यसले नेपाली उपन्यासका क्षेत्रमा आफ्नो स्थान सुरक्षित राख्ने विश्वास व्यक्त गर्नुभयो।

वरिष्ठ समालोचक प्रमोद प्रधानले २०५२ पछि सर्वसाधारण नेपालीले भोगेका र भोगिरहेका त्रासदी र पीडादायी अवस्थालाई पाताल उपन्यासले अभिलेखीकरण भएको चर्चा गर्नुभयो भने वरिष्ठ आख्यानकार नयनराज पाण्डेले पाताल उपन्यासको राम्रो चलचित्र बन्नसक्ने बताउँदै साहित्यिक कृतिको चलचित्र बनाउन जोखिम भने हुने उल्लेख गर्नुभयो ।

कार्यक्रममा “पाताल”को परिचर्चा बारे मोमिला जोशी, नयनराज पाण्डे, विमल भौकाजी र डा. शान्तिमाया गिरीले पनि समीक्षात्मक मन्तव्य राख्नुभएको थियो ।

कार्यक्रममा कृतिकार पदम विश्वकर्माले अनलाइनबाटै धन्यवाद ज्ञापन गर्दै आफ्नो सिर्जना यात्राबारे प्रकाश पार्नु भयो । कार्यक्रमको सहजीकरण संघको कोषाध्यक्ष वरिष्ठ आख्यानकार पद्यमावती सिंहले गर्नु भएको थियो ।

कार्यक्रममा साहित्यकारहरु हिरण्यकुमारी पाठक, पवन आलोक, खेमनाथ दाहाल, युवराज नयाँघरे,  विजध्वज थापा, ललिता दोषी, प्रद्युम्न जोशी, सुमन वर्षा, शकुन्तला जोशी, डी. आर. राई, श्रीबाबु कार्की, छविरमण सिलवाल, प्रदीप सापकोटा, राजन नेउपाने, रश्मि रिमाल, कृष्णमाया विश्वकर्मा, सुमित्रा विश्वकर्मा, जीवनाथ पोखरेललगायतको उपस्तिथि रहेको थियो ।