साहित्य
२०८२ असोज ११, काठमाडौं । कवि नीरा श्रेष्ठको नवीनतम् कविताकृति “काठको बाकस आइसबक्स अनि सपनाहरू” को आज हार्दिक होटल, काठमाडौंमा लोकार्पण भयो ।
लालित्य सिर्जना समाज, ललितपुरले आयोजना गरेको सो कार्यकममा प्रमुख अतिथि वरिष्ठ समालोचक एवं राजनीतिक विश्लेषक प्रा. डा. गोविन्द मानसिंह कार्की, विशिष्ट अतिथिहरु पूर्व मन्त्री वरिष्ठ सर्जक शंकरप्रसाद कोइराला, शहीद गंगालाल राष्ट्रिय हृदय रोग केन्द्रका कार्यकारी निर्देशक प्रा.डा. रवि मल्ल, अनेसासका पूर्व केन्द्रीय अध्यक्ष एवं साहित्यिक पत्रकार संघका अध्यक्ष राधेश्याम लेकाली, वरिष्ट नियात्राकार पवन आलोकले सो कृतिको लोकार्पण गर्नु भएको हो ।
लालित्य सिर्जना समाजका अध्यक्ष बुद्दिमान महर्जनको सभापतित्वमा आयोजित सो कार्यक्रममा प्रमुख अतिथि वरिष्ठ समालोचक प्रा. डा. गोविन्द मानसिंह कार्कीले “काठको बाकस आइसबक्स अनि सपनाहरू” कविताकृतिको समीक्षा गर्दै कवि नीरा श्रेष्ठले यस कृतिमार्फत आफ्नो सफल काव्य यात्रा सुरु गर्नु भएको बताउनु भयो । उहाँले कवि नीरा श्रेष्ठले यस कविताकृतिमार्फत नारीको पीडा, व्यथा, वेदना, देश प्रेम, व्यतिथि विरुद्धमा आवाज, संस्कृतिप्रतिको मोह, आफ्नो सेवाप्रतिको सम्मान भाव, प्रकृतिबाट जीवन बोध, राजनीतिक व्यंग्य, आफ्नो साहित्य सेवा, राष्ट्रिय व्यक्तित्वका बारेमा प्रेम, आमाप्रतिको सम्मान भाव र आफ्नै बारेमा समेत धारणा व्यक्त गर्नु भएको बताउनुभयो ।
कार्यक्रममा कवि नीरा श्रेष्ठले आफ्नो काव्यिक यात्राबारे चर्चा गर्दै सबैलाई धन्यवाद ज्ञापन गर्नुभएको थियो ।
कार्यक्रममा विशिष्ट अतिथिहरू पूर्व मन्त्री वरिष्ठ सर्जक शंकरप्रसाद कोइराला, शहीद गंगालाल राष्ट्रिय हृदय रोग केन्द्रका कार्यकारी निर्देशक प्रा. डा. रवि मल्ल, साहित्यिक पत्रकार संघका अध्यक्ष राधेश्याम लेकाली र वरिष्ठ नियात्राकार पवन आलोकले आफ्नो शुभकामना मन्तव्यमा कवि नीरा श्रेष्ठलाई बधाई दिंदै “काठको बाकस आइसबक्स अनि सपनाहरू”को सफलताको लागि शुभकामना दिनुभयो ।
कवि एवं पत्रकार राजन न्यौपानेले सहजीकरण गर्नु भएको कार्यक्रममा लालित्य सिर्जना समाजका वरिष्ठ सल्लाहकार तथा समालोचक कृष्ण प्रधानले संस्था परिचय दिनुभएको थियो ।
कार्यक्रममा शहीद गंगालाल राष्ट्रिय हृदय केन्द्रकी नर्सिङ प्रमुख विद्या जोशी कोइरालालगायत विभिन्न संस्थाका प्रमुखहरु, साहित्यकार, पत्रकार लगायतको बाक्लो उपस्थिति रहेको थियो ।
प्रतिक्रिया दिनुहोस्: