साहित्य
शारदाम्बा रमाऊन्
हेर्दा हेर्दै लहर लहरै शब्दका शिल्पकार
भित्रैदेखिन् जलदसरिका दर्किऊन् श्लोकधार
मौका पाई सकल कविले रीति यो थाम्न पाऊन्
राम्रो चर्या विकसित भई शारदाम्बा रमाऊन् ॥
आफ्नै आत्मा अनि प्रकृतिका दृश्यलाई टिपेर
भोगेका यी सुख–दुख–कथा भावनामा खिपेर
ल्याऔँ भर्दै मधुर रचना शब्दले प्राण पाऊन्
ताली आऊन् पद–पद सँगै शारदाम्बा रमाऊन् ॥
स्वार्थी दम्भी नजिक नरहून् प्रीतिको स्वाङ पार्छन्
मौका मिल्दा तँ तँ म म गरी मेलमै भ्वाङ पार्छन्
अत्याचारी खल परपरै तर्किऊन् चूप लाऊन्
सच्चा स्रष्टा घुलमिल हुँदा शारदाम्बा रमाऊन् ॥
आनीबानी प्रियकर रहोस् घाम–पानी पचेर
अर्कालाई अझ सुख दिऔँ काव्य–वाणी रचेर
भावी पुस्ता मधुलय टिपून् बाबु–आमा रिझाऊन्
रस्ती–बस्ती प्रमुदित बनून् शारदाम्बा रमाऊन् ॥
राम्रो लेखौँ भरसक नयाँ विम्बमा वस्तु हालौँ
जस्तो पर्दा पनि शुभ कुरा लेख्नमा हात चालौँ
राम्रो शैलीसित नवयुगी कल्पना सल्बलाऊन्
जम्मैलाई शुभ शुभ दिई शारदाम्बा रमाऊन् ॥
यो धर्तीमा अतिशय कडा छन् समस्या र बाधा
देखा पर्छन् कति शहर वा गाउँमा घुम्न जाँदा
त्यस्ता दृश्यावलि कलमले शब्दमा पोख्न पाऊन्
विस्तारै ती सकस नरहून् शारदाम्बा रमाऊन् ॥
छन्द : मन्दाक्रान्ता ।
कैलासकुञ्ज, बूढानीलकण्ठ-४,
भसन्थली, काठमाडौं ।
प्रतिक्रिया दिनुहोस्: