नेपाल आमाको आह्वान

हे सन्तती नेपाली हो मेरो आवाज सुन
यो देश छोडी किन जान्छौ पलायन हुन ।

मातृभूमि बाँजो राख्यौ मरुभूमि फूलाइ
गुन बिर्सी ममताको बस्यौ मन भुलाइ ।

प्रकृतिको स्वर्णभूमि संस्कृतिमा धनी
पोखिएमा तिम्रो पौरख बन्थ्यो स्वर्ग पनि ।

दह्रा पारी आफ्ना बाहु लाग्यौ परदेशतिर
तिम्रो बाटो हेर्छिन् आमा मान्दै आज पिर ।

फर्की आऊ हे परदेशी मातृभूमि भन्छ
तिम्रो श्रम पसिनाले समृद्ध देश बन्छ ।

राजनीतिको मैलो हटाइ तिमी अघि बढ
निस्वार्थको ताज गुथी देशको खाँचो पढ ।

हे सपुत नेपाली हो ! फर्क आफ्नै देश
आफ्नै आँटो पिठो मिठो मान्नुपर्छ बेस ।