२०८३ साउन २९, काठमाडौं । साहित्यिक पत्रकार संघको ५५ औँ वार्षिकोत्सवका अवसरमा आज पाँचजना सर्जकहरूलाई सापस विशिष्ट सर्जक सम्मानद्वारा अभिनन्दन गरेको छ।
अभिनन्दित हुनेहरूमा संस्कृतिविद् डा. पुरुषोत्तमलोचन श्रेष्ठ, चित्रकार प्रा. मदन चित्रकार, कवि ज्ञान उदास र कलाकारद्वय चैत्यदेवी सिंह तथा सन्तोष पन्त हुन् ।
संघका अध्यक्ष राधेश्याम लेकालीको सभापतित्वमा सम्पन्न कार्यक्रममा प्रमुख आमन्त्रित व्यक्तित्व नेपाल ललितकला प्रज्ञाप्रतिष्ठानका पूर्व कुलपति के. के. कर्माचार्य रहेका थिए।
अन्य मञ्चासीन व्यक्तित्वहरूमा मदनदास श्रेष्ठ, इतिहासविद् प्रा.डा. सुरेन्द्र केसी, साहित्यिक पत्रकार संघका पूर्व अध्यक्ष नरेन्द्रबहादुर श्रेष्ठ, समालोचक प्रमोद प्रधान तथा कवि दीपा राई पुन रहेका थिए।
सभाका सभापति राधेश्याम लेकाली तथा प्रमुख आमन्त्रित व्यक्तित्व के.के. कर्माचार्यद्वारा दोसल्ला ओढाएर ढाका टोपी र फूलको माला लगाइदिएर अभिनन्दनपत्र समर्पण गरिएको थियो। सो अवसरमा व्यथित काव्य डायस्पोरा सम्मान २०८२ दीपा राई पुन (अमेरिका)लाई समर्पण गरिएको थियो।
प्रमुख आमन्त्रित व्यक्तित्व पूर्व कुलपति के.के. कर्माचार्यले अभिनन्दित व्यक्तित्वहरू कोही आफ्नो बालसखा रहेको र कोही पर्दा मार्फत् चिनेको बताए। साहित्यिक पत्रकार संघले यसरी स्रष्टाहरूको चयन गरेर सम्मान तथा अभिनन्दन गर्ने गरेकोमा प्रशंसा गर्दै उनले अभिनन्दित व्यक्तित्वहरूलाई बधाई दिएका थिए।
संघका अध्यक्ष राधेश्याम लेकालीले स्वागत मन्तव्य राख्दै कार्यक्रमको उद्देश्यमाथि संक्षेपमा प्रकाश पारेका थिए। वि.सं. २०२९ सालमा स्थापित साहित्यिक पत्रकार संघले विभिन्न जङ्घारहरू तर्दै आएको बताए। कहिले खोला, कहिले नदी र कहिले समुद्र पनि बनेको बताउँदै उनले संघले विभिन्न रचनात्मक कार्यहरू गर्दै आएको बताए। संस्थापक अध्यक्ष भवानी घिमिरेको स्मरण गर्दै उनले २०३८ सालदेखि कथा दिवस मनाउँदै आएको, २०६४ सालसम्म गाईजात्रा कार्यक्रमको आयोजना गरेको, हालसम्म धेरैजना स्रष्टाहरूको सम्मान, अभिनन्दन गरेको र हाल स्रष्टाहरूका कृतिहरूलाई अडियोमा ल्याउन थालेको बताए।
समालोचक प्रमोद प्रधानद्वारा अभिनन्दित व्यक्तित्वहरूको संक्षिप्त परिचय दिइएको थियो । परिचय दिने क्रममा उनले बयासी वर्षीय ज्ञान उदास कवि साहित्यकार मात्र नभई एक पत्रकार समेत भएको बताए। त्यसैगरी प्रा. मदन चित्रकारका विषयमा बोल्दै प्रधानले मदन चित्रकारलाई विरासतमा प्राप्त प्रतिभा भएको बताए। प्रख्यात चित्रकार तेजबहादुर चित्रकारका पुत्र मदन चित्रकारका कला सम्बन्धी थुप्रै पुस्तकहरू रहेको र केही अंग्रेजीमा समेत रहेको बताए। कलाकार चैत्यदेवी सिंहका बारेमा बोल्दै प्रधानले कुमारी चलचित्रकी नायिकाले २०२२ सालमा आमा चलचित्रमा आमाकै भूमिका खेलेको बताए। सोभियत संघ रूसबाट कलामा एम.ए. गरेकी सिंह विदेशमा चलचित्र सम्बन्धी अध्ययन गर्ने पहिलो व्यक्तिसमेत भएको बताए। संस्कृतिविद् पुरुषोत्तमलोचन श्रेष्ठका बारेमा संक्षेपमा प्रकाश पार्दै प्रमोद प्रधानले डा. श्रेष्ठ इतिहास, पुरातत्त्व तथा संस्कृति सम्बन्धी कार्यमा समर्पित रहेको बताए। प्राध्यापक सेवामा रहेका श्रेष्ठका कृतिहरू प्रशस्त रहेको बताउँदै अरूले नगरेको काममा उनले हात हालेको बताए। त्यसैगरी कलाकार सन्तोष पन्तको बारेमा बोल्दै समालोचक प्रमोद प्रधानले अभिनयमा विविधता ल्याउने कलाकारको रूपमा चिनिएको बताए। रेडियो नाटक, स्टेज प्रोग्राम, सिरियलमा छुट्टै पहिचान बोकेका पन्तले प्रतिस्पर्धाको युगमा आफूलाई अरुभन्दा अलग रूपमा प्रस्तुत गर्न सफल रहेको बताए।
अभिनन्दित व्यक्तित्वहरूले पनि आ-आफ्नो मन्तव्य राखेका थिए। मन्तव्यका क्रममा उहाँहरूले खोजी खोजी सम्मान तथा अभिनन्दन गरेकोमा आभार प्रकट गर्दै धन्यवाद दिएका थिए।
नेपाल स्रष्टा समाजका अध्यक्ष श्रीओम श्रेष्ठ ‘रोदन’, कलाकार मदनदास श्रेष्ठ तथा इतिहासविद् प्रा.डा. सुरेन्द्र केसीले शुभकामना मन्तव्य राखेका थिए।
अनामनगरस्थित डालो रेष्टुरेन्टमा भएको कार्यक्रममा संघकी कोषाध्यक्ष पद्मावती सिंहले धन्यवाद ज्ञापन गरेकी थिइन् भने कार्यक्रमको सहजीकरण साहित्यकार सविता श्रेष्ठ ‘बेहोसी’ले गरेकी थिइन्।
प्रतिक्रिया दिनुहोस्: